Yaqinda Shanxay ekspertlar hamjamiyati orasida katta e'tiborga sazovor bo’lgan Fudan universitetida O’zbekiston taqdimoti bo’lib o’tdi. O’zbekiston Respublikasi va Xitoy Xalq Respublikasi o’rtasida diplomatiya munosabatlari o’rnatilganining 20 yilligi munosabati bilan o’tkazilgan mazkur tadbir mamlakatimizning Shanxaydagi Bosh konsulligi tomonidan tashkil etildi.
 
Taqdimotda Xitoy va O’zbekiston o’rtasidagi do’stona aloqalar qadim o’tmishga borib taqalishi, dunyodagi xalqaro va mintaqaviy vaziyatlar qay darajada o’zgarmasin, Xitoy - O’zbekiston aloqalari hamisha o’suvchan va barqaror ahamiyat kasb etgani hamda bunday omillar o’z navbatida, kattadan-katta muvaffaqiyatlarga erishish imkonini berib kelayotgani bir necha bor ta'kidlandi. Siyosiy sohadagi mamlakatlarimiz o’rtasidagi ishonch, iqtisodiyotdagi o’zaro manfaatli hamkorlik va xavfsizlik sohasidagi yaqin munosabatlar, shuningdek, ikki tomonlama manfaatli bo’lgan masalalar yuzasidan bir-birini qo’llab-quvvatlashlar bu fikrni yaqqol tasdiqlaydi. Tadbirda so’zga chiqqanlar ta'kidlashganidek, hozirgi paytda tomonlar BMT, ShHT va boshqa ko’p tomonlama tuzilmalar doirasida nafaqat mintaqa, balki butun dunyoning tinchligi hamda barqarorligiga salmoqli hissa qo’shib kelayotgani holda yaqin hamkorlikni tobora rivojlantirmoqda.

Fudan universiteti huzuridagi Rossiya va O’rta Osiyo tadqiqotlari markazining direktori Chjao Xuashen o’z so’zida O’zbekiston ko’p asrlarga borib taqaladigan tarixga ega ekanligini qayd etdi. U mamlakat rahbariyatining tarixiy meros, xalqning moddiy va ma'naviy qadriyatlari, islom madaniyati obidalarini saqlash va boyitish yuzasidan amalga oshirayotgan chora-tabdirlariga e'tibor qaratdi. Markaz direktori zamonaviy O’zbekiston hududida dunyo sivilizatsiyasi taraqqiyotiga bebaho hissa qo’shgan ko’plab buyuk olim va mutafakkirlar, davlat va din arboblari yashab ijod qilganini alohida ta'kidladi.

Chjao Xuashen hozirgi bosqichda o’zbek xalqi mustaqillikka  erishilganidan keyingi murakkab davrda siyosiy va iqtisodiy boshboshdoqlikka yo’l qo’ymasdan O’zbekistonni barqaror ravishda rivojlanayotgan davlatlar qatoriga olib chiqqan Prezident Islom Karimov rahbarligi bilan faxrlanishi lozimligini aytdi.

Aynan siyosatning iqtisodiyot ustidan hukmronligiga yo’l qo’ymaslik, islohotlarning falaj qilib davolash usulini rad etish, aholi ijtimoiy jihatdan kuchli himoya qilinishi dolzarbligining ustuvor hisoblanishi bo’yicha asosli harakatlar bugungi O’zbekiston muvaffaqqiyatlarining garovi bo’ldi. Olimning so’zlariga ko’ra, O’zbekiston jahon ommaviy axborot vositalarida ko’pincha Shanxay Hamkorlik Tashkiloti Davlat rahbarlarining kengashi, Osiyo Taraqqiyot banki sammiti singari yirik xalqaro tadbirlar muvaffaqqiyatli o’tkaziladigan nufuzli mamlakat sifatida e'tirof etilmoqda.

Xitoy uchun O’zbekiston hamisha ishonch bilan suyanish mumkin bo’lgan yaqin qo’shni diyordir, zero u o’zining burch va majburiyatlariga sodiq ekanligini ko’p marotaba isbotlagan mamlakat hisoblanadi.

Xitoylik ekspertning fikricha, Pekin va Toshkent o’rtasida muammolar va bahsli masalalarning yo’qligi, muhim manfaatlarni o’zaro hisobga olish hamda xalqaro va mintaqaviy maydonda bir-birini qo’llab-quvvatlash, tarixiy mushtaraklik, rasmiy doiralarning o’zaro foydali sheriklikni rivojlantirish yuzasidan ikki tomonlama intilishning mavjudligi kabi qator muhim omillar hisobga olinadigan bo’lsa, har ikki mamlakat ko’p qirrali hamkorlikni yanada rivojlantirish bo’yicha ulkan istiqbolga ega ekanligiga shubha yo’q.

Olimning fikr bildirishicha, respublikani modernizatsiyalash bo’yicha kelgusi harakatlarda ham iqtisodiyotga e'tibor qaratish davom ettirilishi maqsadga muvofiq, zero global inqiroz sharoitida aynan iqtisodiy islohotlarni chuqurlashtirish taraqqiyotning harakatlantiruvchi kuchi, xorijiy davlatlar, jumladan, Xitoy bilan hamkorlikni kengaytirishning  omili sifatida xizmat qiladi.

“Jahon” AA
Shanxay

Bosmadan chiqarish ko`rinishi | Do`stingga yubor | 75 marta o`qilgan