“Jahon” AA, Tokio -Tokio shahrida O’zbekiston Respublikasi va Yaponiya o’rtasida diplomatiya munosabatlari o’rnatilganining 20 yilligiga bag’ishlangan konsert bo’lib o’tdi.

Ushbu madaniy tadbir mamlakatimizning Yaponiyadagi elchixonasi hamda  2011 yilning avgustida Samarqandda bo’lib o’tgan “Sharq taronalari” Xalqaro musiqa festivalida Muxlislar e'tibori sovriniga sazovor bo’lgan Yaponiyaning taniqli “Pinhoniy ajdar” musiqiy folklor guruhi tomonidan tashkil etildi.

“Japan Foundation” jamg’armasi madaniyat va san'at departamentining direktori Bundji Yokomichi “Jahon” axborot agentligi uchun bergan intervyusida O’zbekiston Respublikasi va Yaponiya o’rtasida diplomatiya munosabatlari o’rnatilganining 20 yilligi bilan qutlar ekan, ikki mamlakat o’rtasida madaniy-gumanitar sohadagi hamkorlik ko’hna Buyuk Ipak yo’li vujudga kelgan davrdan buyon davom etib kelayotgani holda keyingi yillar davomida bunday aloqalar tobora rivoj topayotganini ta'kidladi. “Ma'lumki, O’zbekistonning Samarqand, Buxoro va Xiva kabi tarixiy shaharlari Buyuk Ipak yo’lining markazi bo’lgan”, dedi u.

Muloqot chog’ida Bundji Yokomichi “Pinhoniy ajdar” musiqiy folklor guruhi an'anaviy yapon musiqasiga o’ziga xos yondoshgani holda zamonaviy uslubni yaratayotganini qayd etdi.

“So’nggi yillarda “Japan Foundation” jamg’armasi madaniy aloqalar sohasida O’zbekiston bilan faol hamkorlik qilib kelmoqda. Joriy yilda mamlakatlarimiz o’rtasida diplomatiya munosabatlari o’rnatilganining 20 yilligini nishonlash tadbirlari doirasida O’zbekiston elchixonasi ko’magida Yaponiya va O’zbekistonda yana qator madaniy tadbirlarni o’tkazish ko’zda tutilgan”, dedi Bundji Yokomichi.

Jamg’arma direktori “Japan Foundation” yapon jamoatchiligini o’zbek xalqining boy madaniyati, san'ati va an'analari, shuningdek, o’zbekistonliklarni yapon xalqining madaniyati va san'ati bilan tanishtirish bo’yicha qator qo’shma loyihalarni amalga oshirish orqali mamlakatlarimiz o’rtasidagi madaniy hamkorlikni yanada kengaytirishni rejalashtirayotganini ham ma'lum qildi.

“Pinhoniy ajdar” musiqiy folklor guruhining yakkaxon xonandasi Shigeri Kitsu guruhning O’zbekistonga tashrifi chog’ida ansambl a'zolari O’zbekiston Davlat konservatoriyasi talabalari huzurida o’z san'atlarini namoyish qilishganini mamnuniyat bilan esladi.

Uning so’zlariga qaraganda, Tokioda berilgan konsert O’zbekiston va Yaponiya o’rtasida diplomatiya munosabatlari o’rnatilganing 20 yilligini nishonlash doirasida o’tkazilgan ilk tadbirlardan biri bo’ldi. Sh. Kitsu kelajakda yana O’zbekistonga ijodiy safar bilan borish orzusida ekanini aytdi.

Guruh xonandasi Nobuto Yamanaka ham o’z ijodiy jamoasi a'zolari bilan birga Samarqand shahridagi go’zal tarixiy maskan - “Registon maydonida”da milliy musiqa va qo’shiqlarni ijro etishga muyassar bo’lgani o’zi uchun sharaf ekanligini hamda mazkur safar juda ajoyib va unutilmas taassurotlar qoldirganini ma'lum qildi.

Guruhiing prodyusseri Yuki Xata fikr bildirganidek,  diplomatiya munosabatlari o’rnatilganining 20 yilligi munosabati bilan yapon muxlislari uchun uyushtirilgan konsert ansamblning “Sharq taronalari” Xalqaro musiqa festivalidagi musiqiy chiqishlarining mantiqiy davomi bo’ldi.