«Jahon» AA, Pekin - Pekinda Milliy liboslar namoyishi bo’yicha 13-xalqaro madaniyat va do’stlik festivali bo’lib o’tdi. Xitoy xalqaro madaniyat va do’stlik festivali hamda Shanxayda bo’lib o’tayotgan “EKSPO-2010” Butunjahon yarmarkasi tashkiliy qo’mitasi tomonidan uyushtirilgan tadbirda xorijiy diplomatiya vakolatxonalarining jamoalari, Dalyana, Xanchjou, Pekin va ushbu mamlakatning boshqa shaharlari badiiy ansambllari hamda Janubiy-Sharqiy Osiyo mintaqasi ayrim davlatlarining delegatsiyalari ishtirok etdi.

Festival mehmonlari rang-barang milliy liboslar, musiqa asboblari, qo’shiq va raqslar majmuasidan bahramand bo’lishdi hamda dunyoning turli mamlakatlari xalqlarining an'analari bilan tanishishdi.

Pekinning Til va madaniyat universiteti, Senxua universiteti, Xalqaro biznes va iqtisodiyot universiteti kabi nufuzli oliy o’quv yurtlarida tahsil olayotgan o’zbekistonlik talabalarning chiqishlari festivalning eng esda qoladigan voqyealardan biri bo’ldi.

Ular o’ziga xos raqslarni, milliy kiyimlarni, O’zbekistonning xalq amaliy ustalari tomonidan qo’lda tikilgan va ishlangan noyob o’zbek so’zanalari hamda idish-tovoqlarni namoyish etishdi, shuningdek, mehmonlarni o’zbekona choyxo’rlik an'analari bilan tanishtirishdi.

Festival yakunida uning tashkiliy qo’mitasi o’zbekistonlik ishtirokchilarni maxsus sovg’alar bilan taqdirladi.

Bosmadan chiqarish ko`rinishi | Do`stingga yubor | 518 marta o`qilgan