2008 yildan buyon har yili o’tkazib kelinadigan ushbu Berlin mintaqaviy sayyohlik yarmarkasida Berlin va Brandenburg hududida faoliyat ko’rsatadigan sayyohlik firma va kompaniyalari o’z mijozlarini yangi takliflar va sayyohlik yo’nalishlari bilan muntazam tanishtirib boradi. Navbatdagi yarmarkada mintaqaning 70 dan ortiq sayyohlik firma va kompaniyalari ishtirok etdi.

O’zbekiston sayyohlik bozorida yaqinda o’z faoliyatini boshlagan “Wörlitz Tourist” kompaniyasi ushbu yarmarkaning tashkilotchisi hisoblanadi. 2011 yili  mazkur kompaniya sayyohchilarning ikki guruhi uchun  O’zbekiston bo’ylab sayohatni uyushtirgan edi. Joriy yilda ham yana bir necha sayohatchilar guruhining yurtimizga kelib-ketishi rejalashtirilgan.

Germaniya poytaxtida joylashgan Biznes markazining Anjumanlar zalida tashkil etilgan ushbu taqdimot marosimida yarmarka ishtirokchilari va uning ko’p sonli mehmonlari hozir bo’ldilar.  

Tadbir avvalida o’zbek xalqining tarixi, madaniyati va an'analari, respublikaning qadimiy shaharlari hamda me'moriy yodgorliklari, diqqatga sazovor sayyohlik maskanlari, shuningdek, yilning har bir fasli davomida O’zbekistonda mazmunli hordiq chiqarishning keng imkoniyatlari to’g’risidagi atroflicha ma'lumotlar taqdimot marosimi ishtirokchilarining e'tiboriga havola etildi.

O’zbekistonda sayyohlik infratuzilmasining rivoji, taklif etilayotgan sayyohlik yo’nalishlarining rang-barangligi hamda yangi zamonaviy mehmonxonalarni barpo etish, mavjud mehmonxona va sayyohlik majmualarini modernizatsiya qilish yuzasidan respublikamiz hukumati tomonidan ko’rilayotgan chora-tadbirlar haqidagi ma'lumotlar ham  yarmarka ishida qatnashgan sayyohlik firma va kompaniyalari vakillarida katta qiziqish uyg’otdi.    

 “Wörlitz Tourist” sayyohlik kompaniyasining direktori d-r Ulrix Bastek “Jaxon” AA muxbiri bilan bo’lgan suhbat chog’ida  Berlin mintaqaviy 4-sayyohlik yarmarkasi va unda O’zbekistonning ishtiroki xususidagi fikr-mulohazalarini o’rtoqlashar ekan, Berlinning qoq markazida o’tayotgan ushbu sayyohlik forumida  dunyoning ko’plab mamlakatlari qatori O’zbekiston bo’ylab sayyohlik dasturlarini ham germaniyalik sayohatchilarga taklif etayotganidan mamnuniyat bildirdi.  

 - O’tgan yili O’zbekistonga borib-kelgan sayyohlarimiz sizning go’zal mamlakatingiz - Buyuk Ipak yo’li “ganjinasi” bilan bevosita tanishuvdan juda mamnun ekanliklaridan yaxshi xabardormiz, - dedi u. - Marko Polo kabi buyuk sayyoh izidan Samarqand, Buxoro, Xiva va boshqa ko’hna shaharlarga safar qilayotgan germaniyalik sayyohlar O’zbekistonning boy tarixiy-madaniy merosidan, do’st o’zbek xalqining ochiq ko’ngilligi va mehmondo’stligidan katta taassurotlar bilan qaytishmoqda.

O’zbekiston Respublikasi sayyohlik salohiyatining taqdimoti mintaqaviy Berlin sayyohlik yarmarkasi doirasida ilk bora tashkil etildi. Shuni ham ta'kidlash joizki, O’zbekiston bo’ylab sayohat  yo’nalishi mazkur kompaniya dasturini o’ziga xos tarzda boyitdi. Shu munosabat bilan mamlakatimiz 2012 yilning maxsus “Madaniyat” katalogi sahifalaridan joy oldi.

- O’zbekistonning katalogimizga kiritilishi mamlakatingizga safar qilish istagida bo’lgan germaniyalik sayyohlar sonini sezilarli darajada oshishiga xizmat qiladi, - deydi “Wörlitz Tourist” sayyohlik kompaniyasining rahbari. - Aminmanki, bugungi taqdimot marosimida qatnashgan ko’pgina ishtirokchilarda O’zbekistonga bo’ylab safar qilish ishtiyoqi tug’ildi. Ularning Buyuk Ipak yo’li bo’yida joylashgan ertakmonand shaharlarga borish orzulari hademay ro’yobga chiqadi. Biz allaqachon 2012 yil uchun go’zallikda betakror o’lkangiz bo’ylab sayohatga borish istagida bo’lgan mijozlarimizning qator buyurtmalarini qabul qilganmiz.