«Jahon» AA -Belgiyada nashr etiladigan «New Europe» haftanomasida O’zbekistonning iqtisodiy hayotiga bag’ishlangan turkum maqolalar e'lon qilindi. Jumladan, “O’zbektelekom”ning sof foydasi 10,4 milliard so’mga oshdi” maqolasida “O’zbektelekom” aksiyadorlik kompaniyasi Kuzatuv kengashining kompaniya ijroiya organlari rahbarlari, boshqarma va bo’lim boshliqlari ishtirok etgan yig’ilishi haqida hikoya qilinadi. Unda kompaniyaning 2010 yil birinchi choragi davridagi moliyaviy-xo’jalik faoliyati yakunlari hamda Kuzatuv kengashi vakolati doirasiga kiruvchi boshqa masalalar ko’rib chiqilgani aytiladi. Ta'kidlanadiki, hisobot davrida kompaniya foydasi 68,7 milliard so’mni (2009 yilning shu davriga nisbatan taqqoslaganda 108,8 foizni) tashkil etib, reja 104,9 foizga bajarilgan. Joriy yilning birinchi choragida umumxo’jalik faoliyatidan 12,5 milliard so’m foyda ko’rilgan va sof foyda 10,4 milliard so’mni tashkil etadi.

2010 yilning birinchi choragida sarflangan 14 million so’mdan ziyod kapital quyilmalar, jumladan, 4,3 million so’m kompaniyaning o’z mablag’lari hisobidan, 44 million so’m aholi mablag’laridan va 9,6 million so’m xorijiy kreditlar o’zlashtirilgan.

“O’zbekiston Markaziy banki qayta moliyalash stavkasini 14 foizda qoldirdi” sarlavhali maqolada 2010 yildagi monetar siyosatining asosiy yo’nalishlaridan, shuningdek, asosiy tashqi iqtisodiy sharoitlar va pul massasini tartibga solishga xizmat qiluvchi inflyatsiya va devalvatsiya bosimining kamayishini ta'minlash maqsadida inflyatsiyaning mavjud va kutilgan darajasidan kelib chiqqan holda, O’zbekiston Markaziy banki qayta moliyalash stavkasini 14 foizda saqlab qolgani ta'kidlanadi.

“O’zbekiston 2011 yilga borib elektr energiyasini hisobga olishni modernizatsiya qiladi” maqolasida Chexiyaning «Inekon Power» - «Sitronics» kompaniyasi va “O’zbekenergo” davlat aksiyadorlik kompaniyasi o’rtasida imzolangan elektr energiyasini hisobga olishning avtomatlashtirilgan tizimini yo’lga qo’yish va O’zbekistonda elektr energiyasi iste'molini nazorat qilish borasida strategik sheriklik to’g’risidagi memorandum haqida so’z yuritiladi.

Ta'kidlanadiki, loyihani amalga oshirish kelgusi yildan boshlanadi va bir yilga mo’ljallangan bo’lib, uning qiymati 34,8 million AQSh dollarini takshil etadi.

“Loyihaning ishga tushirilishi har yil 2,75 milliard kVt-soat elektr energiyasini tejaydi, shuningdek, yiliga 1,9 million tonna gazlarning havoga ko’tarilib ketishini kamaytiradi. Iqtisod qilingan energiya yiliga 125 million AQSh dollarini tashkil etadi.

Dasturni “O’zbekenergo”ning o’z mablag’lari va O’zbekiston tiklanish va taraqqiyot jamg’armasi resurslari hamda xorijiy sarmoyalar va kreditlar hisobidan moliyalashtirish rejalashtirilmoqda. Ushbu loyihaning ishga tushirilishi umumiy qiymati 360 million AQSh dollaridan iborat bo’lgan elektr energiyasini hisobga olish tizimini modernizatsiya qilish dasturining birinchi bosqichi sanaladi”.

Bosmadan chiqarish ko`rinishi | Do`stingga yubor | 534 marta o`qilgan