«Jahon» AA, Bryussel - Belgiyada nashr etiladigan “New Europe” haftanomasining navbatdagi sonida O’zbekiston iqtisodiyotiga bag’ishlangan turkum maqolalar chop etildi.
“O’zbekiston va Xalqaro valyuta jamg’armasi 2009 yildagi iqtisodiy rivojlanish natijalarini muhokama qilishdi” sarlavhali maqolada yaqinda tashkilotning Yaqin Sharq va Markaziy Osiyo mamlakatlari bilan ishlash boshqarmasi direktorining yordamchisi Talin Koranchelyan xonim boshliq Xalqaro valyuta jamg’armasi missiyasining O’zbekistonga amalga oshirgan tashrifi haqida so’z yuritiladi.
Muhokamalar chog’ida asosiy e'tibor iqtisodiy siyosatni amalga oshirishda inqirozga qarshi qaratilgan chora-tadbirlarga hamda 2009 yilning iqtisodiy yakunlari va 2010 yilda rivojlanish istiqbollari kabi masalalarga qaratildi.
Nashrda Xalqaro valyuta jamg’armasining xulosasiga ko’ra, O’zbekiston jahon iqtisodiy inqirozi davrida ham o’zining jadal rivojlanish sur'atiga barqaror bo’lib kelayotgani, eng asosiysi, mamlakat rahbariyatining oqilona va puxta o’ylangan iqtisodiy siyosati tufayli, byudjetning mavjud profitsit darajasi ta'minlangani va ushbu davrda iqtisodiy o’sishni qo’llab-quvvatlash uchun ahamiyatli bo’lgan resurslarni izlab topish imkoniyatini bergani ta'kidlanadi.
Shuningdek maqolada O’zbekistonning yaqin kelajakdagi vazifasi mamlakat aholisi jon boshiga to’g’ri keladigan real daromadni oshirish va yangi ish o’rinlarini tashkil etish ekani qayd etiladi. Shu ma'noda, infratuzilmani rivojlantirishga e'tibor qaratishga asoslangan sanoatni modernizatsiya qilish davlat dasturi O’zbekistonga sarmoyalar oqimini kengaytirishning asosi bo’lib xizmat qilishi aytiladi.
“O’zbekistonda mikrokreditlash rivojlanmoqda” maqolasida O’zbekiston Markaziy Bankining BMT Taraqqiyot Dasturi, texnik hamkorlik bo’yicha Germaniya jamiyati va Xalqaro moliya korporatsiya bilan hamkorlikda mikromoliyalashni rivojlantirishni rag’banlantirishga yo’naltirilgan 3 ta loyihani amalga oshirayotgani haqida ma'lumot beriladi. Markaziy bank huzuridagi Moliyaviy sektorni rivojlantirish agentligining bayonotiga ko’ra, loyihalar shu yilning o’zida amalga tadbiq etila boshlagan.
O’zbekistonda 100 dan ortiq kredit uyushmalari, 32 ta mikokredit va 48 ta lombard tashkilotlari o’z faoliyatini yuritmoqda. 2009 yilda bankga qarashli bo’lmagan kredit tashkilotlari kredit portfelining umumiy qiymati 193,3 mlrd. so’mni tashkil etdi.
Bugungi kunda O’zbekiston Mikromoliya tashkilotlari va kredit uyushmalari milliy assotsiatsiyasi o’zida 22 ta kredit uyushmasi va 21 ta mikrokredit tashkilotini birlashtirgan.
Foto
Video
Audio
