Orolbo‘yida sho‘rxok yerlarning meliorativ holatini yaxshilashda kollektor-drenaj tarmoqlari muhim o‘rin tutadi.

Qoraqalpog‘iston Respublikasidagi 517 ming gektar sug‘oriladigan yerlarning meliorativ holatini sifatli saqlash, ularning sho‘rlanishiga yo‘l qo‘ymaslik uchun 19 ming 434 kilometr uzunlikdagi kollektor tarmoqlaridan foydalaniladi.

– Ushbu kollektorlarning samarali ishlashi 3 ming 304 kuzatuv nuqtalari orqali nazorat qilib boriladi, – deydi Qoraqalpog‘iston Respublikasi Gidromeliorativ ekspeditsiyasi boshlig‘i Obod Salixov. – Yerosti suvlari sathining ko‘tarilishi va tuproqning minerallashuv darajasi vaqtida va sifatli aniqlanib, qishloq xo‘jaligi mutaxassislariga tegishli tavsiyalar berib borilayotgani paxta, g‘alla va poliz ekinlaridan mo‘l hosil yetishtirishda muhim omil bo‘lmoqda.

Prezidentimizning 2008 yil 19 martda qabul qilingan “2008-2012 yillar davrida sug‘oriladigan yerlarning meliorativ holatini yaxshilash Davlat dasturi to‘g‘risida”gi qarori asosida o‘tgan yili mazkur jamoa tomonidan 154 kilometrdan ziyod kollektorlarni qurish va rekonstruksiya qilish, 3 ming 307 kilometr uzunlikdagi kollektorlarda ta’mirlash va tiklash ishlari olib borildi. Natijada yerlarning unumdorligi oshib, yetishtirilayotgan qishloq xo‘jaligi mahsulotlarining sifati va hajmi ortdi.

Davlat dasturining yakunlovchi bosqichida jamoa tomonidan yigirmadan ziyod turli zamonaviy texnika va mexanizmlar sotib olinib, 123 kilometrdan ziyod masofadagi kollektorlarni qurish, 2 ming 290 kilometr uzunlikdagi melioratsiya tarmoqlarini ta’mirlash va tiklash ishlarini amalga oshirish rejalashtirilmoqda.

O'zA

Bosmadan chiqarish ko`rinishi | Do`stingga yubor | 189 marta o`qilgan