“Jahon” AA, Vena - Yaqinda Venada ikki mamlakat ishbilarmon doiralari ishtirokida O’zbekiston - Avstriya biznes anjumani bo’lib o’tdi. O’zbekiston Respublikasining Avstriyadagi diplomatiya vakolatxonasi tomonidan Avstriya iqtisodiy palatasi bilan hamkorlikda tashkil etilgan mazkur tadbirda o’zaro manfaatli hamkorlik aloqalarini o’rnatish va yurtimizda qo’shma sarmoyaviy loyihalarni amalga oshirishga qiziqish bildirgan Avstriya va O’zbekiston kompaniyalarining rahbarlari hamda vakillari ishtirok etdilar.

Tadbir doirasida O’zbekiston Savdo-sanoat palatasi, Avstriya iqtisodiy palatasi rahbariyati va Avstriya kompaniyalarining vakillari ishtirok etgan “onlayn” video-anjumani ham tashkil etildi.

Dori-darmon, to’qimachilik, mashinasozlik sanoati, qishloq xo’jaligi singari qator ishlab chiqarish sohalaridagi ixtisoslashgan davlat va xususiy kompaniyalarining vakillaridan iborat O’zbekiston delegatsiyasi tomonidan ishlab chiqarish jarayonlariga eng yangi texnologiya va bilimlarni qo’llash yuzasidan avstriyalik sheriklar bilan o’zaro hamkorlik aloqalarini o’rnatish masalasiga alohida urg’u berildi.

O’zbekiston - Avstriya biznes anjumani doirasida kooperatsiya birjasi ham o’tkazildi.

Avstriya iqtisodiy palatasining mintaqaviy direktori X.Valter ikki tomonlama savdo-iqtisodiy va sarmoyaviy munosabatlarda hali foydalanilmagan salmoqli salohiyatning mavjud ekanligini qayd etdi. Uning fikricha, O’zbekiston - Avstriya biznes anjumanlarining o’tkazilishi va iqtisodiy delegatsiyalar almashinuvlari an'anaga aylanib borayotgani holda ular ikki mamlakatning ixtisoslashgan kompaniya va korxonalari o’rtasida to’g’ridan-to’g’ri aloqalarni yo’lga qo’yish ishiga xizmat qilmoqda.

Avstriyada faoliyat ko’rsatadigan “Xemofarma”  kompaniyasining menejeri M.Kondo so’nggi yillarda O’zbekistonda chorvachilik va parrandachilik majmuini rivojlantirish borasida katta ishlar amalga oshirilganini ta'kidladi. “Bizning kompaniyamiz bu sohada o’zbekistonlik sheriklar bilan hamkorlik o’rnatishga tayyordir”,  dedi u.

“Apteka Sum Goldennen Rayxsapfel” kompaniyasi direktori X.Kovarik O’zbekiston bilan hamkorlik borasida ijobiy tajribaga ega ekanligini ma'lum qildi. U O’zbekiston ishbilarmon doiralari vakillarining tashrifi avstriyalik hamkasblar bilan to’g’ridan-to’g’ri aloqalarni o’rnatish, Avstriya kompaniyalari tomonidan taklif qilinayotgan “nou-xau” bilan tanishish va qo’shma sarmoyaviy loyihalarni amalga oshirish imkoniyatlarini o’rganish va ro’yobga chiqarish uchun qulay shart-sharoit yaratishini qayd etdi.

Tadbirlar chog’ida Avstriya kompaniyalari O’zbekistonda xorijiy kapital qo’yilmalari uchun yaratilgan imtiyozlar natijasida respublikamizning sarmoyaviy jozibadorligi yil sayin ortib borayotgani to’g’risida yakdil fikr bildirdilar. Bu, Avstriya ishbilarmon doiralari vakillarining qayd etishlaricha, mavjud sanoat ishlab chiqarishini modernizatsiyalash va O’zbekiston iqtisodiyotining raqobatbardoshligini yuksaltirishga ko’maklashishi bilan birga yangi ishlab chiqarish quvvatlarini barpo etish ishiga ham xizmat qiladi.