«Jahon» AA -O’zbekiston Respublikasi Prezidenti Islom Karimovning 2011 yil asosiy yakunlari va 2012 yilda O’zbekistonni ijtimoiy-iqtisodiy rivojlantirishning ustuvor yo’nalishlariga bag’ishlangan Vazirlar Mahkamasi majlisidagi ma'ruzasi yuzasidan turli davlatlarning ijtimoiy-siyosiy va ekspert doiralari vakillari mamlakatimizning xorijdagi diplomatiya vakolatxonalariga o’zlarining fikr-mulohazalarini bildirishmoqda.

Xususan, «Wider EU» kompaniyasi (Belgiya) direktori, tahlilchi Jan-Frankuiz Rivalaynning fikricha, Prezident ma'ruzasida bayon etilgan dalil va raqamlar jahon iqtisodiyotida inqiroz davom etayotganiga  qaramasdan, respublikaning izchil rivojlanib borayotganligidan dalolat beradi. J-F.Rivalaynning so’zlariga qaraganda, mamlakatda ishlab chiqilgan taraqqiyotning «o’zbek modeli» tufayli shunday natijalarga erishilgan. O’zbekiston iqtisodiyotida erishilgan muvaffaqqiyatlarni nufuzli xalqaro moliya institutlari, xususan, Xalqaro valyuta jamg’armasi, Jahon banki va Osiyo taraqqiyot banki tomonidan berilgan baholar ham tasdiqlaydi.

Ekspertning e'tirof etishicha, O’zbekiston hukumati 2011 yilda «Kichik biznes va xususiy tadbirkorlik yili» Davlat dasturini muvaffaqqiyatli ravishda hayotga tadbiq etdi. Uning fikriga ko’ra, mehnat bozori uchun tadbirkorlik faoliyati bilan risoladagidek shug’ullanishga qodir, zamonaviy fikrlaydigan kishilarning yangi toifasini tayyorlash va o’qitish - bugungi kunda yosh mustaqil respublikalar oldida turgan asosiy vazifalardan biridir. Jahon tajribasi shuni ko’rsatmoqdaki, aynan ana shunday mutaxassislar zamonaviy bozor iqtisodiyotiga o’tish va uni xalqaro bozor shart-sharoitlariga moslashtirishning eng samarali harakatlantiruvchi kuchlaridan biri hisoblanadi. “Shu nuqtai nazardan O’zbekiston rahbariyatining yuqori malakali kadrlar, jumladan, tadbirkorlik sohasi mutaxassislarini tayyorlashga qaratilgan sa'y-harakatlari katta e'tiborga sazovordir”, dedi J-F.Rivalayn.

Yevropa Xalqaro munosabatlar institutining prezidenti Irnerio Seminatore qayd etganidek, bugun O’zbekiston mamlakatni sanoatlashtirishga qaratilgan faol chora-tabrirlar ko’rmoqda. Respublika hukumati qator industrial-sanoat loyihalari ro’yobga chiqarilishini taklif qilmoqda. Shu bilan birga, qishloq joylardagi yashash shart-sharoitlarini maksimal darajada shahar andozalariga yaqinlashtirish bo’yicha katta va sezilarli ishlar amalga oshirilmoqda. Bu O’zbekistonning barcha ijtimoiy-iqtisodiy sohalari taraqqiyoti yangilanishining puxta o’ylangan va pragmatik strategiyasi ko’rsatkichi hisoblanadiki, Prezident Islom Karimovning mar'ruzasi bundan yaqqol dalolatdir.

«Mamlakat katta tabiiy va inson resurslariga ega. Iqtisodiyotning sanoatlashuvi, xorij sarmoyalari hajmining o’sishi, chet el kompaniyalari uchun O’zbekistonda yaratilgan keng imkoniyatlar - bularning barchasi iqtisodiy barqarorlik samaralari hisoblanadiki, kelajakda ham ular o’zining ijobiy natijalarini namoyon etaveradi, deya ta'kidladi ekspert.

Shuningdek, I. Seminatore Yevropa Ittifoqi mamlakatlari va O’zbekiston o’zaro manfaatli hamkorlikni faollashtirish uchun katta salohiyatga ega ekanligini qayd etdi. “Bu salohiyat o’z navbatida O’zbekiston iqtisodiyotiga yangidan-yangi sarmoyalarni jalb qilishga, respublikaning uzoq muddatli iqtisodiy taraqqiyotiga ko’maklashadi”, dedi u.

I. Seminatorening fikricha, 2012 yilning O’zbekistonda «Mustahkam oila yili», deb e'lon qilinishi davlatning oila, jamiyat ijtimoiy taraqqiyoti masalalariga katta e'tibor qaratayotganidan dalolat beradi. 2011 yili respublikada ish haqi miqdori 20 foizdan ziyodga, ijtimoiy nafaqalar va stipendiyalarning 26 foizdan ziyodga oshgani, shuningdek, 2012 yilda davlat byudjeti umumiy xarajatlarining 60 foizdan ko’prog’i ijtimoiy soha va aholini ijtimoiy jihatdan qo’llab-quvvatlashga yo’naltirilgani dalillari buni yana bir bor tasdiqlaydi.

Belgiyalik ekspert Leon Vegnez O’zbekiston Prezidenti Islom Karimovning ma'ruzasi taraqqiyotning «o’zbek modeli» mamlakat rahbariyati tomonidan izchil va muvaffaqqiyatli ravishda hayotga tadbiq etilayotganidan yana bir dalolat ekanligini alohida ta'kidladi.

«Avval boshdanoq «falaj qilib davolash» deb ataladigan siyosat qo’llanishini rad etgan O’zbekiston qadam-baqadam ijtimoiy-iqtisodiy islohotlarni amalga oshira borib, zamonaviy milliy sanoat taraqqiyotiga keng ko’lamli kapital mablag’larini yo’naltirgani va agrosanoat jabhasini modernizatsiyalagani holda ijtimoiy sohaga katta miqdordagi mablag’larni jalb qildi».

Uning so’zlariga qaraganda, bunday davlat siyosati ijobiy natijalarni berdi va bu ma'ruzada ham o’z ifodasini topgan. Xususan, ekspert 2011 yili O’zbekistonda yalpi ichki mahsulot hajmi yuqori darajada o’sgani, sanoat ishlab chiqarishi, qishloq xo’jaligi, chakana savdo aylanmasi va boshqa sohalar o’sishining barqaror sur'atlariga erishilgani diqqatga sazovor jihat ekanligini qayd etdi.

«Italiya-O’zbekiston» Savdo palatasi raisi Luidji Ipertining fikr bildirishicha, «iqtisodiy ko’rsatkichlar shuni aniq-ravshan namoyon etadiki, O’zbekiston yalpi ichki mahsulot barqaror yillik o’sishi 8-10 foiz miqdorida bo’lishi hamda 2015 yilga borib YAIM shakllanishida sanoat ishlab chiqarishi ulushini 28 foizga qadar oshirish uchun mustahkam zamin yaratayotganidan dalolat beradi”.

“Sanoat o’sishi avtomashinalar, yuk avtomobillari, neft va gaz sanoati uchun mo’ljallangan sanoat asbob-uskunalari ishlab chiqarilishining ortishi bilan tasdiqlanadi. Shu bilan birga, qishloq xo’jaligi mahsulotlarining miqdori va sifati ham oshdi. Mamlakatda sarmoyaviy faollik jarayonining yuqori darajasi kuzatilmoqda - ularning hajmi 10,8 milliard AQSh dollariga yetdi. Banklar sanoatni moliyalashtirishga jiddiy ko’mak ko’rsatishmoqda.

Bularning barchasiga taraqqiyotning «o’zbek modeli» tufayli erishildiki, unga ko’ra, iqtisodiy va ijtimoiy islohotlar iqtisodiyotni mafkuradan xoli etish, qonun ustuvorligi va islohotlarning bosqichma-bosqich ro’yobga chiqarilishi kabi tamoyillar asosida amalga oshirilmoqda”, dedi L. Iperti.

U O’zbekiston Prezidentining sanoatlashtirish, innovatsiyalar, zamonaviy texnologiyalar, ta'lim, sog’liqni saqlash hamda ijtimoiy ta'minot va boshqa masalalarga bo’lgan alohida e'tiboriga yuqori baho berdi. L. Ipertining komil ishonch bilan aytishicha, “O’zbekistonning sanoati rivojlangan boshqa mamlakatlar bilan zamonaviy hamkorligi respublikaning muvaffaqqiyatli taraqqiyotiga ko’maklashadi”.

O’z navbatida, «O’zbekiston-Italiya» assotsiatsiyasining raisi Rokko Abram “qo’lga kiritilgan natijalar ko’rib chiqilgan holda, O’zbekiston hukumati mamlakatning bugungi kundagi hamda kelajakdagi dastur va rejalari ro’yobga chiqarilishini o’z oldiga maqsad qilib qo’yganki, Prezident  ma'ruzasi ham bundan yaqqol dalolat beradi”, deya ta'kidladi.

«Iqtisodiy ko’rsatkichlar, ya'ni dunyodagi eng yuqori darajalardan biri sifatida tan olingan YAIM o’sishi, iqtisodiyot tizimlarining izchil qayta qurilishi, barcha jabhalarning rivojlanishi, to’g’ridan-to’g’ri xorij sarmoyalarining uzluksiz oqimi, keng miqyosdagi loyihalar va boshqa ana shunday jihatlarning o’ziyoq mavjud manzarani aniq-ravshan tasavvur etish imkonini beradi”, dedi R.Abram.

Erishilgan ijobiy natijalar bilan cheklanib qolmasdan, O’zbekiston hukumati kelajakka nazar tashlashni afzal ko’rayotgani haqida to’xtalar ekan,  «O’zbekiston-Italiya» assotsiatsiyasining raisi quyidagi muhim fikrni bildirdi: “Majlis natijalaridan shu ma'lum bo’ladiki, 2012 yil yo’nalishi tanlab olingan va  diqqat-e'tibor markazida har doimgidek O’zbekiston xalqi turibdi”.

“Prezident ma'ruzasida aks etgan haqqoniy tanqidiy fikrlar ham O’zbekistonga olg’a intilish, uzluksiz modernizatsiya jarayonida bo’lishga ko’maklashadigan harakatlantiruvchi omillardan biridir. Tanqid imkoniyati, ayniqsa unda muammoning yechimi ham taklif qilingan bo’lsa, siyosiy yetuklikning ajralib turadigan belgisidir», dedi u.

«Xalqaro kuryer» ijtimoiy-siyosiy nashri ilovalarining bosh muharriri, siyosatshunos Dmitriy Drobotun (Ukraina) O’zbekiston 2012 yil ibtidosiga ijtimoiy-iqtisodiy taraqqiyotning munosib ko’rsatkichlari bilan kirib kelganini bayon qildi.  Jahon iqtisodiyotining inqirozdan keyingi xasta  holatiga qaramay, O’zbekiston o’tgan yilni barqaror ravishda rivojlanayotgan mamlakat maqomida yakunladi. O’zbekiston iqtisodiyoti o’sishining yuqori sur'atlari va milliy moliyaviy tizimning barqarorligi xalqaro kredit-moliya institutlari tomonidan ham e'tirof etilmoqda.

Uning so’zlariga qaraganda, O’zbekiston Prezidenti Islom Karimov tomonidan taqdim etilgan 2012 yilga mo’ljallangan ijtimoiy-iqtisodiy rivojlanish dasturi qo’yilgan vazifalarni hal qilish bo’yicha aniq chora-tadbirlarni qamrab olgan. Iqtisodiyotni bosqichma-bosqich erkinlashtirish, kichik va o’rta biznesni rivojlantirish, milliy ishlab chiqaruvchilarning raqobatbardoshligini oshirish, sarmoyalarni jalb qilish, mamlakat tranzit salohiyatini tarraqqiy toptirishning barqaror yo’nalishi - yangidan paydo bo’lgan emas, balki mustaqil rivojlanish yillari davomida respublika rahbariyati tomonidan amalga oshirilayotgan puxta o’ylangan va pragmatik siyosatdir.

«Ijtimoiy soha mustaqil O’zbekiston davlatchiligi taraqqiyotining muhim jihati hisoblanadi. O’zbekiston Prezidenti 2012 yilni «Mustahkam oila yili» deb e'lon qildi. So’nggi yillarda hukumat oilani mustahkamlash, onalikni qo’llab-quvvatlash, tibbiy xizmatlarning sifatini oshirish va undan hamma birdek foydalanishini ta'minlashga, ta'lim sifatini yuksaltirish va uy-joy masalasini hal qilishga yo’naltirilgan davlat dasturlarini hayotga tadbiq etish va ularni qo’llab-quvvatlashga alohida e'tibor bermoqda. Shunisi diqqatga sazovorki, joriy  yilda davlat byudjeti xarajatlarining 60 foizdan ziyod qismini ijtimoiy sohaga yo’naltirish ko’zda tutilmoqda. Bu singari ijtimoiy xarajatlarga mamlakat kelajagiga kiritilayotgan sarmoyalar sifatida qarash lozim. O’zbek xalqi uchun oila har doim eng ustuvor ahamiyatga ega bo’lib kelgan va, shubha yo’qki, jamiyatning bu institutini mustahkamlash davlat va fuqarolarning ham ma'naviy, ham moddiy jihatdan farovonligi yuksalishiga olib boradi.

Koreya Respublikasi Milliy Assambleyasi deputati Kim Yong Gu uzoq yillar mobaynida O’zbekistonning siyosiy, ijtimoiy-iqtisodiy hayotida yuz berayotgan tub o’zgarishlarni diqqat bilan kuzatib kelayotganini ta'kidladi. «Men respublika erishgan yutuqlarga chin dilimdan xursandman va Koreya parlamenti deputati sifatida mamlakatlarimiz o’rtasidagi ikki tomonlama munosabatlarning rivojlanish va mustahkamlanish jarayoniga imkonim qadar ko’maklashishga intilaman. O’zbekiston rahbarining ma'ruzasi uning uzoqni ko’ra olishini hamda chuqur iqtisodiy bilimlarini, mamlakat oldida turgan vazifalar va ularni hal qilish yo’llari haqida aniq tasavvurga ega ekanligini yana bir bor namoyon etadi», dedi Koreya parlamenti deputati.

Deputat respublika Prezidenti tomonidan «Navoiy» xalqaro logistika markazini rivojlantirishga qaratilayotgan e'tiborga alohida urg’u berdi.

U, shuningdek, O’zbekiston Prezidentining Demokratik islohotlarni chuqurlashtirish va fuqarolik jamiyatini rivojlantirish konsepsiyasida ko’zda tutilgan maqsadli vazifalarni izchil ravishda amalga oshirishni davom ettirishning muhimligi haqidagi fikr-mulohazalarini qo’llab-quvvatlashini ma'lum qildi.

Koreya Respublikasi Milliy Assambleyasi sobiq spikeri Li Man Sop aytganidek, “so’nggi yillar davomida O’zbekistonda komil ishonch bilan mustahkamlangan iqtisodiy o’sish, demokratiya asoslarinining mustahkamlanishi va insonlar farovonligining yuksalishi tobora yorqin  kuzatilmoqda”. Bu jihatlar O’zbekiston rahbarining Vazirlar Mahkamasi majlisidagi ma'ruzasida aks etgan bo’lib, spikerning fikricha, mazkur ma'ruza erishilgan muvaffaqqiyatlarni faqatgina baholashga emas, balki rivojlangan, bozor iqtisodiyoti amal qiladigan demokratik davlat qurishning yangi, yanada kattaroq vazifalarini hal qilishga bag’ishlangan.

«Prezident Islom Karimov tomonidan ishlab chiqilgan va amalga oshirilayotgan inqirozga qarshi choralar dasturi O’zbekistonga nafaqat ziyonlarni minimal darajada kamaytirish, balki iqtisodiy o’sishga erishish imkonini berdi. Bosqichma-bosqich ijtimoiy-siyosiy va iqtisodiy isloh etish g’oyasi nafaqat O’zbekistonda barqaror rivojlanishni ta'minlamoqda, balki uni mintaqada yetakchi o’ringa chiqarmoqda», deya o’z fikrini yakunladi suhbatdosh.