«Jahon» AA, Parij - Mamlakatimizning Fransiyadagi elchixonasida O’zbekiston Respublikasining Shanxay hamkorlik tashkilotiga raisligi yakunlariga bag’ishlangan brifing bo’lib o’tdi.
Tadbirda Fransiyaning siyosiy, parlament, iqtisodiy, ekspert-tahlilchi va akademik doiralari, xorijiy davlatlar dipmissiyalari, xalqaro tashkilotlar, xususan, YUNESKO vakillari ishtirok etishdi.
Brifing qatnashchilarining e'tibori O’zbekistonning ShHTdagi raisligi davrida erishilgan natijalar, jumladan, ShHT faoliyatining samaradorligini oshirishga yo’naltirilgan tashkilotning ustivor vazifalarini amalga oshirish borasida qilingan salmoqli ishlarga qaratildi. Ushbu yo’nalishda ShHTning turli tuzilmalari qaror qabul qilish mexanizmlarini optimallashtirish va zamonaviylashtirish, Yangi a'zolarni qabul qilish tartibi to’g’risidagi nizomning ishlab chiqilishi, Tashkilotning xalqaro aloqalarini rivojlantirish va me'yoriy-huquqiy bazasini mustahkamlash, mintaqada xavfsizlik va barqarorlikni ta'minlash bilan bog’liq tashabbuslarni ishlab chiqish va amalga tadbiq etish, Tashkilotga a'zo davlatlar o’rtasida siyosiy, savdo-iqtisodiy, transport-kommunikatsiya va gumanitar sohalardagi hamkorlikni rivojlantirish borasidagi qilingan sa'y-harakatlar sanab o’tildi.
Ishtirokchilar O’zbekiston Respublikasi Prezidenti Islom Karimovning Toshkentda bo’lib o’tgan ShHT Davlat rahbarlari kengashining kengaytirilgan tarkibdagi majlisida so’zlagan nutqining asosiy mazmuni, xususan, mamlakatimizning afg’on muammosini hal etish borasidagi tashabbuslari, O’zbekistonning jahon moliyaviy-iqtisodiy inqirozi oqibatlari haqidagi qarashlari bilan tanishtirildi.
Marosimda so’zga chiqqan Gavr universiteti professori, siyosatshunos Pyer Shabal O’zbekistonning ShHTdagi raisligini yuqori baholab, bu davrda mintaqaviy iqtisodiy hamkorlikni chuqurlashtirish, savdo va sarmoyaviy hamkorlik uchun qulay shart-sharoitlar yaratish, ShHTga a'zo davlatlar o’rtasida energetika, transport va kommunikatsiya, qishloq xo’jaligi, fan va texnika sohalarida amaliy hamkorlikni rivojlantirish borasida ulkan ishlar amalga oshirilganiga e'tibor qaratdi.
“O’zbekiston tomonidan olib borilgan sa'y-harakatlar evaziga ShHT institutlashtirish va xalqaro siyosatda o’zining munosib o’rnini egallashi borasida ulkan natijalarga erishdi. Toshkent sammitida O’zbekiston Respublikasi Prezidenti Islom Karimov ta'kidlaganidek, teng huquqli a'zolar hisobiga Tashkilotni kengaytirishga xizmat qiluvchi Yangi a'zolarni qabul qilish tartibi to’g’risidagi nizomning tasdiqlangani, ASEAN, MDH bilan o’zaro anglashuv memorandumlari qabul qilingani, shuningdek, ShHT va BMT kotibiyatlari o’rtasida hamkorlik to’g’risidagi Qo’shma deklaratsiya imzolangani ShHTni rivojlantirishning muhim bosqichi bo’ldi.
Tashkilot doirasida amalga oshirilgan ishlar aslida ShHTning xalqaro maydondagi nufuzini oshirish yo’lidagi puxta o’ylangan va maqsadli yo’naltirilgan tadbirlar ekanligidan dalolatdir”.
Fransiyaning Strategik tahlil instituti prezidenti, Fransiya Milliy mudofaasi oliy tadqiqotlar instituti direktori o’rinbosari F.Jere ushbu mintaqaviy tashkilotga a'zo davlatlar o’rtasidagi o’zaro hamkorlikning aniq maqsadlarga erishishga yo’naltirilgan kelgusi samaradorligini mustahkamlash borasida faol ish olib borilgan O’zbekistonning ShHTdagi raisligi davri o’zining jo’shqinlik xususiyati bilan ajralib turdi. Shuningdek a'zo davlatlar va kuzatuvchi maqomidagi davlatlar o’rtasidagi hamkorlikni rivojlantirish borasida amalga oshirilgan sa'y-harakatlar ham e'tiborga molikdir.
O’zbekiston raisligi doirasida ushbu tashkilotning xalqaro nufuzini oshirish bo’yicha ulkan ishlar amalga oshirildi.
O’zbekiston tomonidan mintaqaviy xavfsizlik va barqarorlikni ta'minlash borasida qabul qilingan choralar muhim sanaladi. Shu o’rinda O’zbekiston rahbarining afg’on muammosini bartaraf etish, xususan, ushbu jarayonda Afg’onistonga qo’shni bo’lgan davlatlarning ishtirok etishi zarurligi hamda afg’on xalqiga aniq maqsadga yo’naltirilgan iqtisodiy yordam ko’rsatish borasidagi tashabbusi o’ta muhim ahamiyat kasb etadi.
“ShHT makoni o’zida kommunikatsiya aloqalarining ulkan istiqbolga ega bo’lgan bozorini namoyon etmoqda, - deya alohida ta'kidlaydi F.Jere. - Yaqin kelajakda XXRdan boshlanib Markaziy Osiyodan o’tadigan va Yevropagacha yetib boradigan tezyurar poyezdlar bilan ta'minlangan temir yo’lni rivojlantirish loyihasi ko’rib chiqilmoqda. Shu jihatdan men O’zbekiston Prezidentining, XXI asr globallashuv va ulkan almashinuvlar davri bo’ladi, degan fikriga to’la qo’shilaman. Shuning uchun ham zamonaviy kommunikatsiyani rivojlantirish zururligi dolzarb masalaga aylanib bormoqda”.
Foto
Video
Audio
