«Jahon» AA, Lyuksemburg - Lyuksemburg universitetida O’zbekistonda “Barkamol avlod yili” davlat dasturining amalga oshirilishi, mamlakatning ijtimoiy-iqtisodiy rivojlanishi, yaratilgan sarmoyaviy muhit hamda mustaqillik yillariga erishgan yutuqlariga bag’ishlangan taqdimot marosimi bo’lib o’tdi.
Tadbir mamlakatimizning Belgiyadagi elchixonasi tomonidan Lyuksemburg moliyaviy texnologiyalar transferti agentligi (MTTA) hamkorligida tashkil etildi. Unda ushbu mamlakatning rasmiy, iqtisodiy va ilmiy doiralari, Tashqi ishlar vazirligi hamda MTTA vakillari qatnashdi.
Taqdimot chog’ida ishtirokchilarga “Barkamol avlod yili” davlat dasturining ijrosi, dekmoratik, ijtimoiy-iqtisodiy sohalarda amalga oshirilayotgan o’zgarishlar, mamlakatning ijtimoiy-iqtisodiy rivojlanishi, sarmoyaviy muhit hamda xorijiy samroyadorlar uchun yaratilgan qulay shart-sharoitlar haqida ma'lumot berildi. Tadbirda aynan “Barkamol avlod yili” davlat dasturi doirasida O’zbekiston Bank-moliya akademiyasining tinglovchilari MTTA tomonidan tashkil etilgan o’quv kurslarida ishtirok etishgani qayd etildi.
Marosim qatnashchilarining e'tibori xorijiy sarmoyadorlar va tadbirkorlar uchun mislsiz soliq va bojxona imtiyozlari berilgan “Navoiy” erkin iqtisodiy-industrial zonasi faoliyatiga jalb etildi.
Tadbir doirasida O’zbekiston Bank-moliya akademiyasi tinglovchilari mamlakatimizning bank-moliya tizimi, jahon iqtisodiy inqirozining oqibatlarini bartaraf etish va yengillashtirish borasida olib borilayotgan chora-tadbirlarga bag’ishlangan taqdimot marosimini o’tkazishdi.
Ishtirokchilar o’zbek xalqining tarixiy merosi, an'analari hamda O’zbekistonning iqtisodiy va sayyohlik salohiyatiga katta qiziqish bildirishdi.
Xususan, Lyuksemburg moliyaviy texnologiyalar transferti agentligi milliy dasturlari direktori Jozi Tiiz taqdimot davomida e'tiborga havola etilgan ma'lumotlar O’zbekiston hukumati tomonidan o’sib kelayotgan avlod tarbiyasiga juda jiddiy e'tibor qaratilayotganidan dalolat berishini ta'kidladi. “Jahon” axborot agentligiga bergan intervyusida u jumladan, “olib borilayotgan bunday siyosat demokratiya tamoyillariga asoslanib rivojlanayotgan O’zbekiston davlatining porloq kelajagiga bo’lgan ishonchni yanada oshiradi, shuningdek, ushbu mamlakat bank-moliya tizimini rivojlantirish borasida o’zining puxta rejasiga ega va bu ishda yosh avlodga alohida e'tibor qaratilmoqda”, deya ta'kidladi.
- Biz ta'lim va O’zbekistonning bank va moliya tizimi vakillarining malakasini oshirish sohasidagi hamkorligimizning yanada kengaytirish va mustahkamlashga tayyormiz va shunday bo’lishiga ishonamiz. Shu yilning avgust oyida Lyuksemburg universitetida O’zbekiston Bank-moliya akademiyasining o’n nafar tinglovchisi tahsil oladi. O’zbekiston Bank-moliya akademiyasi bilan hamkorligimiz rivojlanib borayotganidan xursandmiz va bank-moliya tizimidagi Yevropa tajribasini o’zbekistonlik do’stlarimiz bilan o’rtoqlashishga tayyormiz. Bizning mutaxassislarimiz tez-tez mamlakatingizga borishib, Bank-moliya akademiyasi tinglovchilari bilan treninglar o’tkazib kelishadi. Shu ma'noda, muassasalarimiz o’rtasidagi hamkorlik ulkan ahamiyat kasb etadi, - deya yakunladi so’zini J.Tiiz.
Moliya masalalari bo’yicha «Klienbart» konsalting kompaniyasi boshqaruvchisi Paul Kliynbart shu yil aprel oyida O’zbekistonda bo’lgani haqida gapirdi. U o’z safari chog’ida mamlakatimizning bank tizimi vakillari hamda O’zbekiston Bank-moliya akademiyasi tinglovchilari bilan uchrashishga muyassar bo’lganini aytdi.
- Tinglovchilarning bilim darajasi meni lol qoldirdi. Ularning yoshi hali kichik bo’lishiga qaramay, aksariyati bugungi kunda nafaqat bank tizimida faoliyat yuritishga, balki tegishli boshqarmaning boshlig’i vazifasini ham bajarishga tayyor, - dedi P.Kliynbart. - Shuni mamnuniyat bilan qayd etishni istardimki, O’zbekiston hukumati o’sib kelayotgan avlodga ta'lim va tarbiya berish ishiga katta e'tibor qaratmoqda, mamlakatda yosh avlodning kelgusida jamiyatda o’ziga munosib o’rinni egallashi va Vatanining gullab-yashnashiga o’z hissasini qo’shishi uchun barcha shart-sharoitlar yaratilgan.
Foto
Video
Audio
