O’zbekiston jamoatchiligi va xalqi so’nggi kunlarda Qirg’izistonning janubidagi O’sh shahrida ro’y berayotgan voqealar yuzasidan katta xavotir va tashvishda ekanini ma’lum qiladi.

O’sh shahri ko’chalari va uylarida bosqinchi to’dalar tomonidan tinch aholiga nisbatan sodir etilayotgan va jazosiz qolayotgan qotillik, zo’ravonlik, qirg’in, o’t qo’yish va talon-taroj holatlari butun jahon jamoatchiligining g’azabini qo’zg’atmoqda.

Ayniqsa, ommaviy tus olgan qotillik, talon-taroj va uylarga o’t qo’yish holatlari O’sh shahri va O’sh viloyatida yashayotgan o’zbek millatiga mansub aholiga nisbatan sodir etilayotganiga toqat qilib bo’lmaydi va bu jiddiy tashvish uyg’otmoqda.

Uyushtirilayotgan, boshqarilayotgan va ig’vogarlik xususiyatiga ega bunday xatti-harakatlar millatlar o’rtasida nizo qo’zg’otish, Qirg’iziston janubida yashayotgan kam sonli millatlar vakillari uchun chidab bo’lmaydigan sharoitni vujudga keltirish maqsadida uzoqni ko’zlab sodir etilmoqda, deb xulosa chiqarish uchun barcha asoslar bor.

Bularning barchasi maqsadlari qirg’iz xalqi manfaatlaridan mutlaqo yiroq bo’lgan qabih niyatli kuchlar fitnasi tufayli sodir etilayotganiga bizda hech qanday shak-shubha yo’q.

Bugun O’sh shahrida ro’y berayotgan bunday voqealar Qirg’izistonda istiqomat qiluvchi barcha millat va elatlar vakillari o’rtasidagi ko’p asrlik, an’anaviy, tarix sinovlaridan o’tgan do’stlik va hamkorlik munosabatlariga mutlaqo mos kelmaydi.

Ko’p sinovlar va voqealarni boshidan kechirgan Qirg’iziston xalqi va uning sog’lom kuchlari mamlakatdagi vaziyatni barqarorlashtirish, ko’p millatli Qirg’iziston xalqining tinch va farovon kelajagini ta’minlash maqsadida, jinoyatchilik hamda xunrezliklarga chek qo’yish uchun yetarlicha aql-zakovat va hayot tajribasiga ega ekaniga ishonamiz.

Toshkent shahri, 2010 yil 12 iyun

Bosmadan chiqarish ko`rinishi | Do`stingga yubor | 1405 marta o`qilgan