Hujjatda qayd etilishicha, O’zbekiston Respublikasi Prezidenti Islom Karimov tashabbusi bilan tashkil etilgan ushbu anjuman O’zbekiston Respublikasi Sog’liqni saqlash vazirligi tomonidan Jahon sog’liqni saqlash tashkiloti (JSST), BMT Bolalar jamg’armasi (YUNISEF), BMT Aholishunoslik jamg’armasi bilan hamkorilikda o’tkazildi. Simpozium ishida xalqaro tashkilotlar rahbarlari va vakillari, AQSh, Xitoy, Rossiya, Kanada, Buyuk Britaniya, Germaniya, Italiya, Ispaniya, Fransiya, Finlyandiya, Shveysariya, Chexiya, Daniya, Janubiy Koreya singari jahonning qariyb 40  mamlakati sog’liqni saqlash vazirliklarining rahbarlari, tibbiyot sohasidagi taniqli olimlar, xalqaro ekspert va tahlilchilardan iborat salkam 300 nafar mutaxassis ishtirok etgani qayd etilgan.

Simpozium doirasida “Zamonaviy bosqichda Yevropa mintaqasida Mingyillik rivojlanish maqsadlarining 4 va 5- bandlariga erishishning ustuvor yo’nalishlari”ga bag’ishlangan davra suhbati, satellit konferensiyalar, yetakchi olim va mutaxassislarning namunali tibbiyot klinikalari va markazlarida onalik va bolalikning dolzarb masalalari bo’yicha master-klasslari tashkil etildi”, deya qayd etiladi mazkur hujjatda.

O’zbekiston Prezidentining 2011 yil 24 noyabrdagi Farmoniga muvofiq, Jahon Sog’liqni saqlash tashkiloti Bosh direktori Margaret Chen JSSTning sog’liqni saqlash sohasidagi faoliyatini tashkil etish va birlamchi tibbiy-sanitariya yordamini rivojlantirish, xotin-qizlar va bolalar sog’ligini saqlashning Global strategiyasini amalga oshirish borasidagi ulkan xizmatlari uchun I darajali “Sog’lom avlod uchun” ordeni bilan mukofotlangani hujjatda xabar qilinadi. Davlatimiz rahbari Islom Karimov Margaret Chenga ushbu yuksak mukofotni topshirdi.

Margaret Chen anjumandagi o’z chiqishida O’zbekistonda sog’liqni saqlash sohasiga, shu jumladan, ona va bola salomatligini muhofaza etishga ulkan e'tibor qaratilayotgani, ushbu soha bosh ustuvor yo’nalish etib belgilangani nafaqat bugungi kun, balki kelajak nuqtai nazaridan ham eng to’g’ri strategiya ekanligini alohida ta'kidladi.

“BMTning 2000 yilda o’tgan Sammitida qabul qilingan Mingyillik rivojanish maqsadlari (MRM) jahon hamjamiyati uchun insonlar turmush darajasi va farovonligini yaxshilash bo’yicha qator muhim vazifalarni belgilab berdi, - dedi o’z chiqishida Jahon sog’liqni saqlash tashkilotining Yevropa mintaqasi byurosi direktori Jujanna Yakab. - Hujjatning 4 va 5 bandlaridagi maqsadlarga erishish bo’yicha ko’rsatkichlar - bolalar o’limini kamaytirish va onalar salomatligini yaxshilash - muhim omillar hisoblanadi. Bu esa MRM doirasida amalga oshirilayotgan faoliyatning samardorligidan dalolat beradi. O’zbekistonda Prezident Islom Karimov tashabbusi bilan bu borada ulkan ishlar amalga oshirildi, erishilgan yutuqlar dunyoning boshqa davlatlari uchun namuna bo’lib xizmat qiladi”.

Simpoziumda so’zga chiqqan ishtirokchilar o’tgan davr mobaynida O’zbekistonda tibbiy xizmatning jahon andozalari darajasidagi o’ziga xos milliy modeli yaratilganini ta'kidladilar. Sifat jihatidan yangi, eng yuksak talablarga javob beradigan, shoshilinch tibbiy yordam ko’rsatish va turli yo’nalishlarga ixtisoslashtirilgan markazlarni qamrab olgan tibbiy muassasalar tarmog’i tashkil etildi. Viloyatlarda kattalar va bolalar uchun ko’p tarmoqli shifoxonalar, yangi tug’ruq majmualari barpo etildi, sog’liqni saqlash tizimining birlamchi bo’g’ini, xususan, qishloq vrachlik punktlarining bazasi mustahkamlandi.

Hujjatda, shuningdek, Toshkent Xalqaro simpoziumining rezolyutsiyasi ham taqdim etilgan bo’lib, unda Toshkent xalqaro simpoziumi ishi yakunlariga ko’ra, O’zbekistonda ona va bola salomatligini muhofaza qilishning milliy modeli: “Sog’lom ona - sog’lom bola” dasturi taraqqiyot yo’lidagi Global Maqsadlarga erishishdagi eng samarali strategiyalardan biri sifatida tan olinganligi hamda O’zbekistonda onalar va bolalar sog’ligini muhofaza qilish borasida erishilgan salmoqli yutuqlar e'tirof etilganligi ta'kidlanadi.

Ushbu rasmiy hujjat Birlashgan Millatlar Tashkiloti Bosh kotibi nomiga taqdim etilgan bo’lib, u BMT huzuridagi 192 davlatning missiyalari o’rtasida jahonning olti tilida tarqatildi.