O‘zbekiston Respublikasi Oliy Majlisi Qonunchilik palatasida Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi mablag‘larini boshqarish bo‘yicha Parlament komissiyasining navbatdagi yig‘ilishi bo‘lib o‘tdi. Unda tegishli vazirlik va jamoat tashkilotlarining vakillari, oliy ta’lim muassasalari rahbarlari, jurnalistlar ishtirok etdi.

Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi mablag‘larini boshqarish bo‘yicha Parlament komissiyasining raisi A.Saidov va boshqalar Prezidentimiz Islom Karimov rahnamoligida mamlakatimizda demokratik islohotlarni chuqurlashtirish jarayonida nodavlat notijorat tashkilotlari va fuqarolik jamiyatining boshqa institutlarini har tomonlama rivojlantirishga alohida e’tibor qaratilayotganini ta’kidladi. Bu borada mustahkam qonunchilik bazasi yaratilgan. Ayni paytda mamlakatimizda besh mingdan ziyod nodavlat notijorat tashkilotlari faoliyat ko‘rsatmoqda.

Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi mablag‘larini boshqarish bo‘yicha Parlament komissiyasining tashkil etilishi mazkur tashkilotlarni moliyalashtirish manbalarini shakllantirish uchun mustaqil tizim va obyektiv sharoitlar yaratmoqda. Parlament komissiyasi tashkil etilganidan buyon jamoat tashkilotlarining ijtimoiy ahamiyatga molik loyihalarini qo‘llab-quvvatlash uchun davlat budjetidan 21 milliard so‘mdan ortiq mablag‘ yo‘naltirildi.

2011 yilda bu ko‘rsatkich 5 milliard so‘mni tashkil etdi. Mablag‘lar nodavlat notijorat tashkilotlari va fuqarolik jamiyatining boshqa institutlari o‘rtasida demokratik talablar, tenglik, ochiqlik, oshkoralik, xolislik tamoyillari asosida taqsimlandi. Davlat subsidiyasi, grantlari, ijtimoiy buyurtmasi shaklidagi loyihalarda 1,3 mingga yaqin jamoat tashkiloti qamrab olindi.

2011 yilda o‘tkazilgan beshta grant tanlovlari asosan kichik biznes va xususiy tadbirkorlikni qo‘llab-quvvatlash, kasanachilikni rivojlantirish, yoshlarni ish bilan ta’minlash, imkoniyati cheklanganlar manfaatlarini himoyalash, barkamol avlodni voyaga yetkazish, atrof-muhit va aholi salomatligini muhofazalash, ommaviy axborot vositalarini qo‘llab-quvvatlash, ularning faolligini oshirishga yo‘naltirildi. Tashkil etilgan yarmarkalar, forumlar, mavsumiy maktablarda yoshlarga huquqiy maslahatlar berilib, ularni ishga joylashtirishga yaqindan ko‘maklashildi.

Yig‘ilishda Parlament komissiyasi faoliyati, moliyalashtirilgan loyihalar ijrosi, mablag‘larning maqsadli sarflanishi monitoringi natijalari atroflicha muhokama etilib, joriy yildagi dolzarb vazifalar belgilab olindi.

O‘zA

Bosmadan chiqarish ko`rinishi | Do`stingga yubor | 176 marta o`qilgan