Jismoniy imkoniyati cheklangan bolalar o‘rtasida o‘tkazib kelinayotgan «Maftunkor ranglar jilosi» an’anaviy ko‘rik-tanlovining Xorazm viloyati bosqichi bo‘lib o‘tdi, deya xabar beradi O‘zA.

Iste’dodli o‘g‘il-qizlarni aniqlash, ularni har tomonlama qo‘llab-quvvatlash va rag‘batlantirish maqsadida tashkil etilgan mazkur tanlovda 35 nafar iqtidor sohibi qatnashdi.

- Har bir ishtirokchi o‘zi chizgan rasmlar to‘plamini hakamlar hay’atiga taqdim qildi, – deydi «Kamolot» yoshlar ijtimoiy harakati Xorazm viloyati kengashi xodimi Dildora Jumaniyozova. – Bundan tashqari, ular belgilangan vaqtda erkin mavzuda rasm chizib, bilim va mahoratini namoyish etdi.

Ayniqsa, Yangiariq tumani vakili Bekzod Ro‘zmatov, Urganch tumanidan Madiyor Solayev, Urganch shahridan Xudoyshukur Rajabovning turli mavzudagi ijod namunalari muxlis va mutaxassislarda katta qiziqish uyg‘otdi.

Ushbu yosh mo‘yqalam sohiblari tanlovning mamlakat bosqichida qatnashish huquqini qo‘lga kiritdi.

Bosmadan chiqarish ko`rinishi | Do`stingga yubor | 1051 marta o`qilgan