«Jahon» AA, Tokio - Tokioda O’zbekistonning sayyohlik maskanlari va boy madaniy merosi mavzuiga bag’ishlangan taqdimot marosimi bo’lib o’tdi. U  mamlakatimizning Tokiodagi diplomatiya vakolatxonasi, Yaponiya sayyohlik agentliklari uyushmasi (JATA),”O’zbekiston havo yo’llari”  Milliy aviakompaniyasi vakolatxonasi va «AJT INC» yapon sayyohlik kompaniyasi hamkorligida tashkil etildi. 

Dunyo sayyohlari uchun tashkil qilingan Rishton, Jizzax, Termiz shaharlari bo’ylab yangi sayyohlik yo’nalishlari, milliy  aviakompaniyaning xalqaro va mahalliy miqyosdagi faoliyati, O’zbekistonning tarixiy shaharlari, milliy taomlari hamda yangi  sayyohlik dasturlari to’g’risidagi axborotlar yapon sayyohlik firmalari vakillarida katta qiziqish uyg’otdi.

Taqdimot chog’ida Yaponiya sayyohlik agentliklari uyushmasi (JATA) xalqaro sayohatlar departamentining direktori Toshiaki Shigeta  O’zbekistonning yuksak sayyohlik salohiyati, boy madaniyati, an'analari hamda me'moriy-tarixiy yodgorliklari xorijiy sayyohlarni  o’ziga jalb etayotgan muhim omillar bo’lib xizmat qilayotganini qayd etdi. T.Shigeta bir uchi Yaponiyaning Nara shahrigacha yetib  borgan, biroq markazi O’zbekiston hududida bo’lgan Buyuk Ipak yo’li yapon va o’zbek xalqlarini tarixan bog’lab kelganini  ta'kidladi.   

JATA xalqaro sayohatlar departamenti bosh menejerining o’rinbosari Xiroshi  Yanagida Yaponiya sayyohlik agentliklari uyushmasi  a'zolari O’zbekistonga katta qiziqish bilan qarashayotgani va bundan keyin yapon sayyohlari uchun muntazam ravishda O’zbekiston  bo’ylab sayohatlar tashkil etishni rejalashtirayotganini ma'lum qildi.

“Taqdimot marosimida 20 dan ziyod yapon sayyohlik tashkiloti vakillari ishtirok etishdi. Tashkilotchilar mazkur tadbirning  o’tkazilishi O’zbekiston bo’ylab sayohatlarni ishlab chiqish va tashkil etishga ko’maklashishi barobarida Samarqand, Buxoro, Xiva,  Toshkent singari tarixiy shaharlarni o’z ko’zi bilan ko’rishni istagan yapon sayyohlari sonining sezilarli darajada ko’payishiga  xizmat qilishiga komil ishonch bildirishmoqda”, dedi u.

«AJT INC» yapon sayyohlik kompaniyasi Bosh direktori Eidji Ivase 11 yildan ziyod davr mobaynida «O’zbekturizm» Milliy  kompaniyasining Yaponiyadagi sherigi hisoblanadigan o’z kompaniyasi yapon sayyohlari uchun O’zbekiston bo’ylab sayohatlar uyushtirib  kelayotganini qayd etdi.

Uning ta'kilashicha, O’zbekistonga yapon sayyohlarining oqimi yil sayin oshib bormoqda. Ko’pgina yapon sayyohlik firmalarining  vakillari Kunchiqar mamlakat sayyohlari uchun O’zbekiston Respublikasining tarixiy shaharlari bo’ylab yangi tur-paketlarni taklif  etish niyatidalar.

«AIR CRYSTALL INC» yapon sayyohlik kompaniyasining direktori Tayeko Fushima o’zining kompaniyasi ham O’zbekistonga sayohatlarni  tashkil etib kelayotganini aytdi. U joriy yilning iyunida «Mega-info-tur» dasturi doirasida O’zbekistonga borish imkoniyatiga ega  bo’lganini ma'lum qilar ekan, yurtimizning boy madaniy-tarixiy merosi hamda o’zbek xalqining samimiyati va ochiqko’ngilligi o’zida  unutilmas taassurotlar qoldirganini ta'kidladi.

Shuningdek, u ajoyib va betakror o’zbek milliy taomlari ham yaponiyalik sayyohlarni hayratga solganini aytdi. “O’zbekiston bo’ylab  yangi sayyohlik yo’nalishlarini ishlab chiqish va ularni yapon jamoatchiligining e'tiboriga havola qilish niyatidaman”, dedi T.Fushima.

Bosmadan chiqarish ko`rinishi | Do`stingga yubor | 333 marta o`qilgan