“Jahon” AA, Berlin - So’nggi yillarda O’zbekistonning boy tarixiy va madaniy merosiga, shuningdek, sayyohlik salohiyatiga Germaniya jamoatchiligining qiziqishi tobora ortib bormoqda. Germaniyaning turli nashrlarida mamlakatimiz sayyohlik industriyasining bugungi taraqqiyoti va tarixiy yodgorliklari mavzulariga bag’ishlangan maqolalarning tez-tez chop etilayotgani bunga yaqqol misol bo’la oladi.

Masalan, yaqinda Germaniyaning «Wörlitz Tourist» sayyohlik kompaniyasi tomonidan chop etiladigan «KulTouren 2012» jurnalida «O’zbekiston: Buyuk Ipak yo’li bo’ylab» sarlavhali maqola e'lon qilindi. Unda Sharq va G’arb sivilizatsiyalarining rivojlanishi va bir-birini boyitishida Buyuk Ipak yo’lining ahamiyati haqida atroflicha fikr yuritiladi. “Uzoq o’tmishda hozirgi O’zbekiston hududidan Buyuk Ipak yo’li bo’ylab tuya karvonlari o’tishgani qadim va go’zal Samarqand hamda Buxoroning naqshinkorlik san'ati namunalarida o’z aksini  topgan”, deb yozadi nemis nashri.

Maqolada ta'kidlanishicha, bepoyon Qizilqum sahrosi va gullab-yashnayotgan voha shaharlari o’rtasidagi keskin farqlar, shuningdek, mamlakatimizning rang-barang madaniyati, betakror tabiati dunyoning barcha nuqtalaridan sayyohlarni o’ziga jalb etib keladi.

Germaniya zaminida chop etiladigan nashrlardan yana biri - «Orient» jurnalida e'lon qilingan “Marko Polo izidan Buyuk Ipak yo’li bo’ylab” sarlavhali maqolada ham O’zbekistondagi tarixiy shaharlarning o’ziga xos jihatlari qalamga olingan.

Maqolada qayd etilishicha, «qadimgi Buyuk Ipak yo’lining tarixiy shaharlari - Sharqning eng go’zal masjidi qaror topgan Samarqand, minoralari bir paytlarda sahrodan o’tayotgan karvonlar uchun mayoq vazifasini bajargan Buxoro, bugungi kungacha yaxshi saqlanib qolgan, noyob tarixiy-me'moriy yodgorliklarga ega bo’lgan Xiva hamda go’zal eski shahari va gavjum Chorsu bozori bilan mashhur O’zbekiston poytaxti -  azim va zamonaviy Toshkent - bularning barchasi go’yo bir ipga tizilgan marvaridlardir».

Yana bir nashr - Germaniyaning eng yirik savdo tarmoqlaridan biri bo’lgan «Lidl» kompaniyasining sayyohlik axborotnomasi ham yaqinda O’zbekiston manzaralari aks haqida suratlar bilan birga yurtimiz haqidagi mufassal axborotlarni chop etdi. Aytish lozimki, iste'molchilarning katta ishonchiga sazovor bo’lgan «Lidl» kompaniyasi 10 yildan ortiq vaqt mobaynida o’z mijozlariga yuqori sifatli xizmat ko’rsatib kelayotgani holda u dunyo mamlakatlari bo’ylab sayohatga  taklif qiladigan turli tuman sayyohlik kompaniyalari bilan ham muvaffaqiyatli hamkorlikni yo’lga qo’ygan.

Yuqoridagilardan tashqari, Germaniyada chop etiladigan «Sayohatlar va dengiz sayrlari» nomli nashrning maxsus sonida ham 2012 yilda O’zbekiston bo’ylab bir haftalik bahorgi va yozgi sayohat yo’nalishlari taklif qilingan. Unda sayyohlar uchun Toshkent, Samarqand, Buxoro va Shahrisabz kabi tarixiy shaharlarni o’z ko’zi bilan ko’rish imkoniyatlari atroflicha qalamga olingan.

Nomlari sanab o’tilgan nashrlarning barchasida O’zbekiston va uning tabiiy, iqlimiy xususiyatlari va o’ziga xosliklari haqidagi, shuningdek, sayyohlar uchun asqotadigan ko’pgina boshqa ma'lumotlar ham o’z ifodasini topgandir.

Bosmadan chiqarish ko`rinishi | Do`stingga yubor | 186 marta o`qilgan