Mamlakatimizda ommaviy axborot vositalari jadal rivojlanmoqda va aholining siyosiy, ijtimoiy faolligini yanada oshirish, mamlakatni demokratik yangilash va modernizatsiya qilishning ta’sirchan vositasi bo‘lib xizmat qilmoqda.

Yurtimizda amalga oshirilayotgan davlat dasturlari mohiyatini va ular berayotgan yuksak samaralarni aholiga yetkazishga qaratilgan maqolalar, ko‘rsatuv va eshittirishlar tayyorlash hamisha soha xodimlarining diqqat-e’tiborida. Fuqarolarning siyosiy faolligini oshirish, ayniqsa, huquqiy madaniyatini yuksaltirishga qaratilgan ishlar ko‘lami tobora kengaymoqda.

27 iyun – O‘zbekiston Respublikasi Matbuot va ommaviy axborot vositalari xodimlari kuni munosabati bilan Adliya vazirligida bo‘lib o‘tgan tadbirda shu haqda so‘z bordi. Unda O‘zbekiston Milliy axborot agentligi – O‘zA, O‘zbekiston Milliy teleradiokompaniyasi, markaziy gazeta va jurnallar hamda adliya idoralari xodimlari ishtirok etdi.

O‘zbekiston Respublikasi adliya vazirining birinchi o‘rinbosari A.Ahmedov Prezidentimiz Islom Karimov rahnamoligida mamlakatimiz sud-huquq tizimida izchillik bilan olib borilayotgan islohotlar berayotgan yuksak samaralar mazmun-mohiyatini keng ommaga yetkazishda ommaviy axborot vositalarining alohida o‘rni borligini ta’kidladi. Axborot asri, deya e’tirof etilayotgan bugungi kun jurnalist zimmasiga yanada zalvorli vazifalarni yuklamoqda. U nafaqat xolis va tez axborot yetkazuvchi, eng avvalo, milliy manfaatlarimiz himoyachisi hamdir.

Tadbirda huquqiy targ‘ibot ishlarida faollik ko‘rsatib ishlayotgan ommaviy axborot vositalari xodimlaridan bir guruhiga sovg‘alar topshirildi, deya xabar beradi O‘zbekiston Milliy Axborot Agentligi.

Bosmadan chiqarish ko`rinishi | Do`stingga yubor | 1020 marta o`qilgan