Birlashgan Arab Amirliklarining Dubay shahrida futbol bo‘yicha “Dubai Matchworld Cup – 2012” xalqaro turnirida O‘zbekiston olimpiya terma jamoasi ikkinchi, Toshkentning “Bunyodkor” jamoasi uchinchi o‘rinni egalladi.

Ikkinchi marotaba o‘tkazilgan nufuzli musobaqada O‘zbekiston olimpiya terma jamoasi, “Bunyodkor”, Rossiyaning “Zenit” va “Rostov”, Ukrainaning “Shaxtyor”, Shveysariyaning “Ksamaks”, Tunisning “Etual dyu Saxel” va Iroq olimpiya terma jamoasi g‘oliblik uchun kuch sinashdi.

Musobaqa qoidasiga ko‘ra, sakkiz ishtirokchi ikki guruhga bo‘lindi. Har bir jamoa guruhda ikkitadan uchrashuvda maydonga tushdi. Guruh g‘oliblari finalda to‘p surgan bo‘lsa, o‘z guruhida ikkinchi o‘rinni egallagan jamoalar uchinchi o‘rin uchun o‘zaro raqobatlashdi.

2012 yili Londonda bo‘ladigan XXX yozgi Olimpiya o‘yinlarining Osiyo saralash musobaqasiga puxta tayyorgarlik ko‘rayotgan O‘zbekiston olimpiya terma jamoasi “B” guruhida Ukraina chempioni “Shaxtyor”, Rossiyaning “Rostov” va Tunisning “Etual dyu Saxel” jamoalarini ortda qoldirib, finalga chiqdi.

Hal qiluvchi bellashuvda o‘zbekistonlik olimpiyachilar “A” guruhida birinchi o‘rinni egallagan Rossiya chempioni “Zenit”ga qarshi to‘p surdi. Asosiy e’tiborni 5 fevral kuni Avstraliyaga qarshi o‘tkaziladigan Olimpiya o‘yinlarining saralash uchrashuviga qaratgan Vadim Abramov o‘rtoqlik maqomida bo‘lgan bu o‘yinda deyarli barcha o‘yinchilarni maydonda sinab ko‘rdi.

Uchrashuv hamyurtlarimiz uchun omadsiz boshlandi. Jamoamiz posboni Akbar To‘rayev 5-daqiqada qoida buzgani uchun hakam tomonidan maydondan chetlatildi. Belgilangan penaltidan Danko Lazovich unumli foydalanib, hisobni ochdi. Bir kishi kam bo‘lib to‘p surgan olimpiyachilarimiz Yevropaning tajribali va mahoratli futbolchilarini jamlagan Rossiya chempioniga munosib qarshilik ko‘rsatishga harakat qildi. Biroq o‘yin oxirigacha o‘z darvozasidan yana to‘rtta to‘p olib chiqdi. O‘zbekiston vakillariga ikkinchi o‘rin nasib etdi.

Joriy mavsumda Osiyo chempionlar ligasida ishtirok etadigan O‘zbekiston chempioni – “Bunyodkor” futbolchilari “Dubai Matchworld Cup – 2012” turnirining “A” guruhida ikkinchi o‘rinni egalladi. Qoidaga ko‘ra, Mirjalol Qosimov shogirdlari uchinchi o‘rin uchun bellashuvda “B” guruhida ikkinchi pog‘onadan joy olgan Ukrainaning ko‘pkarra chempioni “Shaxtyor” (Donetsk) jamoasi bilan kuch sinashdi.

Uchrashuv birinchi bo‘limining 17-daqiqasida Bahodir Pardayev hisobni ochdi. O‘yinning ikkinchi yarmida “Shaxtyor” vakili Duglas Kosta hisobni tenglashtirdi – 1:1. Qolgan daqiqalarda hisob o‘zgarmadi va g‘olib jamoa penaltilar seriyasida aniqlandi.

5:4 hisobida zafar quchgan “Bunyodkor” futbolchilari “Dubai Matchworld Cup – 2012” xalqaro turnirini uchinchi o‘rinda yakunladi.

O‘zA

Bosmadan chiqarish ko`rinishi | Do`stingga yubor | 178 marta o`qilgan